Hyrje
Trajnimi i zhvilluar në Bashkinë Maliq u konceptua si një hapësirë gjithëpërfshirëse mësimi, reflektimi dhe debati mbi rolin e të rinjve në qeverisjen vendore dhe funksionimin e Këshillave Rinorë Vendorë. Ky aktivitet është pjesë e projektit “Këshillat Vendorë Rinorë për Bashki më Pjesëmarrëse”, i cili mbështetet nga Agjencia Kombëtare për Rininë dhe synon të forcojë kapacitetet e të rinjve për të marrë pjesë aktive dhe me ndikim në proceset e politikëbërjes lokale.
Në këtë trajnim morën pjesë 15 të rinj dhe të reja nga Maliqi dhe njësitë administrative përreth, duke siguruar balancë gjinore dhe përfaqësim nga zonat urbane e rurale. Pjesëmarrësit sollën me vete jo vetëm interesin për të kuptuar institucionet, por edhe problematikat që e bëjnë jetën e tyre të përditshme të vështirë: mungesën e hapësirave rinore, papunësinë, distancën mes shkollës dhe tregut të punës, si dhe ndjenjën e mosbesimit te institucionet vendore.
Ky trajnim nuk ishte vetëm një proces njohjeje me legjislacionin apo teoritë e demokracisë. Ai u kthye në një mjedis ku të rinjtë testuan veten si aktorë të mundshëm të ndryshimit, duke reflektuar mbi boshllëqet mes kornizës ligjore dhe praktikës, dhe duke ngritur pyetjen thelbësore: çfarë roli real mund të kenë Këshillat Rinorë në jetën e një bashkie si Maliqi?
Dita III – Organizimi i brendshëm dhe planifikimi i punës së KVR-ve
Dita e tretë u fokusua në funksionimin e brendshëm të një Këshilli Rinor Vendor: si strukturohet, cilat janë funksionet e tij, çfarë marrëdhëniesh duhet të ketë me pushtetin lokal dhe cilat janë instrumentet për planifikim dhe vetëvlerësim.
Përmes një sesioni praktik me “skedat e punës”, të rinjtë mësuan si të hartojnë një plan vjetor aktivitetesh dhe si të masin ecurinë e këshillit nëpërmjet vetëvlerësimit dhe raportit vjetor. Ky proces i vuri pjesëmarrësit përballë sfidës së mendimit strategjik: si ta përkthejnë energjinë rinore në plane konkrete, me objektiva të matshëm dhe të arritshëm.
Në punën në grupe, të rinjtë hartuan një draft plani aktivitetesh për një vit. Prioritetet që dolën në pah ishin të qarta dhe përfaqësuese:
- krijimi i hapësirave rinore për kulturë dhe sport,
- promovimi i transparencës në vendimmarrjen vendore,
- aktivitete kundër papunësisë rinore,
- dhe nisma ndërgjegjësuese mbi pjesëmarrjen qytetare.
Ky proces shënoi një pikë kthese: nga perceptimi i këshillave si struktura të largëta e formale, të rinjtë filluan t’i shohin si hapësira ku ata mund të jenë aktorë realë të ndryshimit.
