Dita e tretë dhe përmbyllëse e trajnimit në Bashkinë Pustec iu kushtua organizimit të brendshëm të Këshillave Rinorë Vendorë dhe planifikimit konkret të punës së tyre vjetore. Në këtë fazë, fokusi kaloi nga reflektimi dhe analiza drejt veprimit praktik, duke u ndalur te mënyrat se si idetë dhe nevojat e të rinjve mund të shndërrohen në plane të strukturuara, të realizueshme dhe të matshme.
Përmes përdorimit të “skedave të punës” dhe udhëzimeve të ekspertëve të projektit, pjesëmarrësit u njohën me hapat kryesorë të hartimit të një plani vjetor aktivitetesh, përcaktimin e objektivave konkrete, ndarjen e përgjegjësive dhe mekanizmat e vetëvlerësimit dhe raportimit periodik. Ky proces i ndihmoi të rinjtë të kuptojnë rëndësinë e planifikimit strategjik dhe të ndjekjes së ecurisë së punës, si elemente thelbësore për funksionimin serioz të një strukture përfaqësuese.
Në punën në grupe, të rinjtë përgatitën plane njëvjeçare që pasqyronin nevojat dhe prioritetet reale të komunitetit të tyre. Planet përfshinin objektiva të matshëm dhe nisma konkrete, si krijimi i hapësirave rinore për aktivitete kulturore dhe sportive, zhvillimi i fushatave ndërgjegjësuese mbi punësimin dhe mbrojtjen e mjedisit, rritja e përfshirjes së vajzave dhe e të rinjve nga komunitetet minoritare, si dhe iniciativa që synojnë forcimin e transparencës dhe dialogut me institucionet e qeverisjes vendore. Ky ushtrim praktik ndihmoi pjesëmarrësit të shohin veten jo vetëm si përfitues, por si aktorë aktivë të ndryshimit në komunitetin e tyre.
Në përmbyllje të ditës, grupet prezantuan planet e hartuara përpara ekspertëve të projektit dhe përfaqësuesve të bashkisë. Prezantimet u vlerësuan për realizëm, kreativitet dhe dëshirë të qartë për angazhim qytetar. Diskutimet përfundimtare u zhvilluan në një atmosferë pozitive dhe bashkëpunuese, duke reflektuar besimin se Këshillat Rinorë Vendorë mund të shndërrohen në mekanizma realë dhe funksionalë të pjesëmarrjes qytetare, nëse mbështeten me seriozitet dhe vazhdimësi.
Trajnimi në Pustec dëshmoi se të rinjtë kanë dëshirën dhe potencialin për t’u përfshirë aktivisht në jetën publike, por ky potencial kërkon nxitje, orientim dhe mbështetje të qëndrueshme. Problemet e identifikuara gjatë tri ditëve të trajnimit – mungesa e informacionit, e besimit, e fondeve dhe e strukturave funksionale – treguan se procesi i përfshirjes rinore kërkon një përpjekje të përbashkët nga institucionet vendore, organizatat e shoqërisë civile dhe vetë komuniteti rinor.
Në përfundim, të rinjtë u larguan nga trajnimet me bindjen se pjesëmarrja nuk është thjesht një mundësi, por një e drejtë dhe një përgjegjësi qytetare. Ata u zotuan të angazhohen për ngritjen dhe funksionimin e Këshillit Rinor Vendor në Pustec dhe të ndajnë përvojën e fituar me bashkëmoshatarët e tyre. Aktiviteti u mbyll me ndarjen e certifikatave të pjesëmarrjes dhe me reflektime të përbashkëta mbi rëndësinë e vazhdimësisë së projekteve të tilla.
